දිමුත්, මාලිංග ඇතුළු 10 දෙනෙක් පකිස්ථාන තරග සංචාරයට සහභාගී නොවන බව දැනුම් දෙති

ජාතික කණ්ඩායම නියෝජනය කරන ක්‍රීඩකයින් 10 දෙනෙකු පකිස්ථාන තරග සංචාරයට සහභාගී නොවන බව ශ්‍රී ලංකා ක්‍රිකට් ආයතනයට දැනුම් දී තිබේ.

ශ්‍රී ලංකා ක්‍රිකට් ආයතනය නිවේදනය කළේ දිමුත් කරුණාරත්න, ලසිත් මාලිංග, ඇන්ජලෝ මැතිව්ස්, දිනේෂ් චන්දිමාල්, ධනංජය ද සිල්වා, කුසල් ජනිත්, නිරෝෂන් දික්වැල්ල, සුරංග ලක්මාල්, අකිල ධනංජය සහ තිසර පෙරේරා එම තරග සංචාරයට එක් නොවන බවට දැනුම් දී ඇති බව ය.

එක්දින සහ ටෙස්ට් නායක දිමුත් කරුණාරත්න මෙම සංචාරයට සහභාගි නොවීම හේතුවෙන් පකිස්ථානය සමග පැවැත්වෙන එක්දින තරගාවලියේදී ලහිරු තිරිමාන්න ශ්‍රී ලංකා කණ්ඩායමට නායකත්වය ලබා දෙන බව ශ්‍රී ලංකා ක්‍රිකට් ආයතනයේ සභාපති ශම්මි සිල්වා ප්‍රකාශ කළේ ය.

එක්දින තරග 3කට සහ පන්දුවාර විස්ස තරග 3 කට සහභාගි වීම සඳහා ශ්‍රී ලංකා කණ්ඩායම ලබන 25 වන දා පකිස්ථානය බලා පිටත්ව යාමට නියමිත ය.